Tafankina tamin’ny fefy manamorona ny lalan’i Marais Masay mihitsy ilay fiara 4×4 nifandona tamin’ny fiara kely iray teny Ankorondrano omaly tolakandro. Araka ny fanazavan’ireo olona nahita ny fitrangan’ny loza teny an-toerana, avy any Ankorondrano hihazo an’Andranobevava ireo fiara ireo, ilay fiara 4×4 teo aloha no notringisin’ilay fiara kely avy aoriana rehefa tsy nahita ilay dongona fampihenana ny hafainganam-pandehan’ny fiara ny mpamilin’ilay fiara kely. Vokany, nifatratra teny amin’ilay fiara 4×4 ity farany ity. Mafy ny fifandonana satria tafahodina mihitsy ilay fiara kely nitrongy raha tafapitika kosa ilay fiara 4×4. Tsy nisy kosa ny aina nafoy fa potika tanteraka ny lohan’ilay fiara kely.
Tsy vao izao fa matetika ahitana lozam-pifamoivoizana amin’iny lalan’i Marais Masay Ankorondrano iny. Maro amin’ireo mpamily fiara mandeha amin’iny lalana iny no tsy mahafehy sy tsy mahita ireo dongona fampihenana ny hafainganam-pandeha mipetraka amin’iny lalana iny. Misy amin’ireo tanora mpisetrasetra amin’ny môtô sy fiara koa mazàna mahita loza amin’iny lalana iny.
J.C