Noraisim-potsiny ireo vehivavy roa voarohirohy ho mpanataka poketra sy sakaosy amin’ny hareza eny Analakely. Teo am-panatahana poketra an’ny renim-pianakavina iray niantsena tao amin’ny toeram-pivarotana hazandrano ao amin’ny pavillon Analakely izy roa vavy ireto no voasambotry ny polisin’ny UIR, ny asabotsy maraina teo. Araka ny fanazavan’ny polisy, enim-bavy izy ireo no miaraka rehefa hanao ny asa ratsiny ka eny amin’iny faritra Analakely iny. Narahin’izy ireo avy hatrany ity renim-pianakaviana ity tamin’io fotoana io. Notatahan’izy ireo avy hatrany ny poketrany mialoha ny nidiran’ilay ramatoa tao amin’ilay toeram-pivarotana trondro. Teo am-pandoavana vola kosa, nahatsikaritra izy fa tsy tao anaty poketrany intsony ny fitoeram-bolany. Nisy nahatsikaritra kosa ireto jiovavy ireto nandritra izany ka raikitra ny fifanenjehana. Nifanehatra tamin’ny polisy anefa izy ireo ka tsy afa-bela ny roa vavy raha tafaporitsaka kosa ny ambiny.
Ireo mpivarotra eo Analakely mihitsy koa no olana amin’ny fisamborana ireo tontakely ireo satria miray tsikombakomba amin’izy ireny ny ankamaroany.
J.C